Fleurs du Mal Magazine
Zebra-hunting
Riding a zebra – Museum of Natural History
fleursdumal.nl magazine
More in: Riding a Zebra
François Villon
(1431-1463?)
Ballade des proverbes
Tant grate chievre que mau gist ;
Tant va le pot a l’eaue qu’il brise;
Tant chauf’on le fer qu’il rougist,
Tant le maill’on qui qu’il se debrise ;
Tant vault l’omme comme on le prise,
Tant s’esloigne il qu’il n’en souvient,
Tant mauvais est qu’on le desprise ;
Tant crie l’on Noël qu’il vient.
Tant parl’on qu’on se contredit ;
Tant vault bon bruyt que grace acquise ;
Tant promest on qu’on se desdit ;
Tant pri’on que chose est acquise,
Tant plus est chere, et plus est quise,
Tant la quiert on qu’on y parvient,
Tant plus est commune, et mains requise ;
Tant crye l’on Noël qu’il vient.
Tant ayme on chien qu’on le nourrist ;
Tant court chanson qu’elle est aprise ;
Tant gard’on fruit qu’il se pourrist ;
Tant bat on place qu’elle prise ;
Tant tarde on que fault entriprise ;
Tant se haste on que mal advient ;
Tant embrasse on que chiet la prise ;
Tant crye l’on Noël qu’il vient.
Tant raille on que plus n’en rit ;
Tant despend on qu’on n’a chemise ;
Tant est on franc que tout s’il frit ;
Tant vault «tien » que chose promise ;
Tant ayme on Dieu qu’on suyt l’eglise;
Tant donne on qu’emprunter convient;
Tant tourne vent qu’il chiet en bise;
Tant crye l’on Noël qu’il vient.
Prince, tant vit fol qu’il s’avise,
Tant va il qu’aprés il revient,
Tant le mate on qu’il se ravise ;
Tant crye l’on Noël qu’il vient.
François Villon poetry
kempis.nl poetry magazine
More in: Archive U-V
Thank you for reading Fleurs du Mal - magazine for art & literature